النقنقه

نقنوووووق مان

بالفرح بالزعل....منق .. وقت بنكره أو منحب ...منق .. فاضيين أو مشغولين..منق .. صبح ومسا وكل شي عنا بينتسى إلا النق ... بالجد وبالمزح..... منق
::: جذور النق :::
شباب وصبايا منين بيجيبوا هالنق ؟!؟!؟باختصار بجيب النق من بيت أبوه .... نحن جيل اعتاد على التربية النقاقة...
قوم فيق صارت الساعة ستة .... تعال اتغدى ....جاي جاي
يلا قوم اتغدى ..... جاي بس دقيقتين
يلا تعال اتغدى....قوم اتغدى هلأ بيبرد الأكل .... قوم اتغدى يلا....
وفي السهرة :تعال تعشا ما تغديت منيح لأنك...تعال تعشى...ما بدك تتعشى...يلا قوم ع العشا....
::: حكاية نق :::
في سنة البكالوريا: إيمتى بدي خلص وفوت ع الجامعة بقا( وبيضل بينق وينق وبينسى يدرس)
في السنة الأولى للجامعة: أووف شو عم حن لأيام المدرسة...إيمتى بدي أتخرج يالله هف لسه كم سنة هفف
بعد التخرج : ييي شو مشتاق لرفقاتي بالجامعة وكيف كنا....هفف يا ريتنا ما تخرجنا ضاق خلقي من النوم للضهر والطلعات والفرجة ع التلفزيون بدي اشتغل واستقر
بعد الشغل : تضرب هالحياة من البيت للشغل وبعدين بتحكيلك كم تلفون وبتحط راسك وبتنام لتفيق ع الشغل...شو هالعيشة هفف والله شي بملل...حياة بتقصر العمر
خطب بنت بحبها:هفف إيمتى بدنا نتزوج ونكون مع بعض لوحدنا...
أتجوزوا:هفف من هالروتين والله شي بملل شو رأيك نجيب ولد
صار الشب أبو العيال: لك شو هالبلوة بدي ضل عم زق غراض متل الحمار...هفف ع هالعيشة يرحم أيام كنا مو فاضيين غير للحب
::: أعزائي الأعضاء كنتم مع مسلسل هفف من بطولة نقاق عربي من هذا الزمان :::
::: نقاق شرقي :::
أنا بدي امرأة مثقفة ارتبط فيها تفهم عليي شو بحكي وتناقشني فيه ويكون عندها وجهة نظرها يلي تدافع عنها ....
بعد الزواج من المثقفة والذي لم يستمر أكثر من 3 أشهر
طلعتلي روحي بضل حاطة راسها بالكتاب...لا بهمها طبخ ولا نفخ...بعدين بضل عم تجادلني... وعلى وجهة نظري ووجهة نظرك هديك المرة لسختها كف طيرتلها وجهها كله مو بس وجهة نظرها...هفف أن بدي وحدة حنونة تسايرني
بعد زواجه من الحنونة الذي لم ولن يستمر أكثر من شهرين
: قرفتني حياتي دايماً بالمطبخ وشو ما قلتلها بتقول حاضر. كيف بدها تربي ولادي على هالشخصية الانهزامية لا بتهش ولا بتنش وحتى لما طلقتها بكيت شوي وما حكيت معي ولاكلمة يا زلمة.....لك أنا بدي وحدة حلوة ست بتفهم بالاتيكيت....
بعد زواجه من ست الصالون الذي لم ولن يستمر أكثر من شهر
هفف يا زلمة هلكتني بمصاريف اللبس والمكياج تبعها هالمفزلكة يخرب بيتها شو فاضية ما في ولا مرة قرأت شي كتاب وشو ما بتحاكيها بتقلك ما بعرف وشو يعني....(( لك أنا ما بقدر غير عيش مع وحدة مثقفة يا زلمة ))
ويستمر الشاب شرقي النقاق بالنق إلى أن يأخذ الله أمانته
::: شعب بنق ليوم النق :::
والشعب العربي بشكل عام نقااااااااااااااااق .....
ها ها سألتني ليش لأنو يا أخي نحنا على طول بنقول شوف أوروبا ما أحلا شوارعها ... شوف العالم شلون.....شوف شوف السير عندهم شوف النظافة .... ما نحن هون بالبلد لم فرض وضع حزام الأمان للسائقين... قمنا الدنيا وما قعدناها وصرنا على نق ونسق
والله بدفع الغرامة وما بحط الحزام...شو بدهون يتحكموا فينا وقال شو بدهون يقلدوا بلاد برا قال ...!!؟!؟!؟!؟!!
آآآيـــــــه سكتنا ما عاد نق... هلأ دوركون لتنقوا .. أنو خلصونا من هالايميل يلي كلو نق و حاجة نق !!!!!
-------------------------------------------------------------------------------------------------
أجمل ما في الأرواح أنها لا تملك لسان لتنق....أي والله
والكلمة الأخيرة ....لماذا لا نستمتع بكل مرحلة من العمر !!!! وأكيد ....... أفضل الكلام ما قل ودل

ههههههههه
فعلا حلوه والشعب نقاق
الانسان ما بيعجبه شي وما بعبي عينه الا التراب
مشكور اخي
تقبل مروري

سبحان الله
هي غريزة بالانسان ما بعبي عيونو ولا شي
زي ما بحكي المثل :
البني آدم ما بعبي عينو غير التراب
شكرا الك عالطرح